एजेन्सी-
मेटा स्वामित्वको लोकपि्रय मेसेजिङ एप ह्वाट्सएपले एक नयाँ फिचर ल्याउने तयारी गरिरहेको छ । उक्त फिचर आएसँगै प्रयोगकर्ताहरुले गुगल ड्राइभमा सुरक्षित रहेका ह्वाट्सएपका च्याट ब्याकअपलाई एक्सपोर्ट गर्न वा अन्य कुनै सर्भर वा डिभाइसमा ब्याकअप गर्न सक्नेछन् । अर्थात् गुगल ड्राइभमा रहेको ह्वाट्सएप ब्याकअपलाई पेन ड्राइभमा सार्न सकिनेछ ।
यो नयाँ फिचर तत्कालका लागि ह्वाट्सएपका बिजनेस प्रयोगकर्ताका लागि परीक्षण भइरहेको छ । बिजनेस अकाउन्ट भएका प्रयोगकर्ताहरुले विभिन्न डिभाइसमा ह्वाट्सएप प्रयोग गर्दा च्याट तथा सम्पर्क नम्बरहरुका विषयमा समस्या उत्पन्न नहोस् भनेर यो फिचर ल्याएको बताइएको छ ।
ह्वाट्सएपका विभिन्न नयाँ फिचरको बिटा भर्सनको बारेमा जानकारी दिने WABetaInfo ले यस विषयमा रिपोर्ट प्रकाशित गरेको छ । जसमा नयाँ फिचरको एक स्क्रिनसर्ट पनि सेयर गरिएको छ । रिपोर्ट अनुसार यो अपडेटसँगै ह्वाट्सएपको च्याटको ब्याकअपलाई पेनड्राइभ जस्ता कुनै पनि लोकल डिभाइसमा संग्रहित गर्न सकिनेछ । उक्त ब्याकअपमा टेक्स्ट च्याटसँगै फोटो तथा भिडियो र भ्वाइस मेसेज पनि रहनेछ ।
ह्वाट्सएपले निकट भविष्यमै गुगल ड्राइभ ब्याकअपमा निश्चित स्टोरेजको सीमा तय गर्ने बताइएको छ । यस्तो अवस्थामा ह्वाट्सएप ब्याकअपलाई पेनड्राइभमा सार्न सकिने फिचर निकै उपयोगी हुने अपेक्षा गरिएको छ । यो सँगै अब प्रयोगकर्ताले गुगल ड्राइभको स्टोरेज भरिएसँगै ह्वाट्सएप ब्याकअपलाई पेनड्राइभमा सारेर गुगल ड्राइभ खाली गर्न सक्दछन् । त्यसरी पेनड्राइभमा सारिएका ब्याकअप जुनसुकै बेला गुगल ड्राइभ सार्न पनि सकिन्छ ।
ह्वाट्सएप्को यो नयाँ फिचर कहिलेदेखि जारी हुन्छ भन्ने विषयमा हाल कुनै जानकारी दिइएको छैन । हाल यो फिचर एन्ड्रोइडका लागि मात्रै रहेकोमा आइओएस प्रयोगकर्ताले आइक्लाउडबाड पनि ब्याकअप लिन सक्छन् कि सक्दैनन् भन्ने पनि खुलेको छैन ।
समाचार अनुसार यो नयाँ फिचरको परीक्षण ह्वाट्सएप बिजनेस अकाउन्टको बिटा भर्सन २.२२.१३.१० पनि भैरहेको छ । बिजनेस एपको आइओएसको बिटा भर्सन २२.१२.०.७३ मा पनि यो फिचरको परीक्षण भैरहेको छ ।
