एपीपी / सैन्य सम्झौता हुँदैन
काठमाडौं । नेकपा माओवादी केन्द्रका अध्यक्ष पुष्पकमल दाहाल (प्रचण्ड) ले विकास र समृद्धिको यात्रा सहमति र सहकार्यबाट अगाडि बढ्नुपर्ने बताएका छन्। बिहीबार पेरिसडाँडामा आयोजित रितबहादुर खड्का स्मृतिसभालाई सम्बोधन गर्दै उनले एक्लै अगाडि बढ्ने अंहकार सबैले छोड्नुपर्ने धारणा राखेका हुन्।
राजनीतिक परिवर्तनको लडाईंपछि अब समाजवाद निर्माणको लडाईं गर्न सहकार्य, एकता आवश्यक भएको उनको भनाई छ। उनले राजनीतिक दल एकबद्ध हुँदा नेपालमा ठूला ठूला राजनीतिक परिवर्तन भएको दाबी गरे। ‘विकास र समृद्धिका लागि गठबन्धनलाई थप बलियो पार्ने’ उनले भने,‘नेपालका शान्ति प्रक्रियाका बाँकी काम पूरा गर्नका लागि यो गठबन्धन अझ बलियो पार्ने र विकास र समृद्धिको नयाँ यात्राका लागि पनि यसलाई अगाडि बढाउन जरुरी छ।’ प्रचण्डले सहकार्य र एकता हावी हुने कि निषेधात्मक दम्भ र अंहकार हावी हुने लडाई चलिरहेको दाबी गरे। उनले विगतका कमिकमजोरी सुधार्दै गठबन्धनलाई थप बलियो बनाउन कार्यकर्तालाई निर्देशन दिए।
उनले स्टेट पाटनरसिप प्रोग्राममा नेपालले सम्झौता नगर्ने प्रतिबद्धता प्रधानमन्त्रीले गठबन्धनमा छलफल हुँदा बताएको जानकारी गराए। उनले एपीपी / सैन्य सम्झौता आफूले हुन नदिने र त्यस्तो कुनै सैन्य सम्झौताको तयारी समेत नभएको स्पष्ट पारे। सांसदहरुले अमेरिकी एसपीपीबारे प्रतिनिधिसभाको बैठकमा प्रश्न गर्दै आइरहेका छन्।
