राष्ट्रपति भण्डारीले देउवालाई शीतल निवास बोलाएर ओलीकै जस्तो व्यवहार देखाएपछि…

काठमाडौं । प्रधानमन्त्री शेरबहादुर देउवा र राष्ट्रपति विद्यादेवी भण्डारीबीच बिहीबार भेटवार्ता भयो । राष्ट्रपति भण्डारीले बोलाएपछि देउवा शीतल निवासमा पुगेका थिए । तर शीतल निवासमा राष्ट्रपतिको व्यवहार फरक देखियो ।

राष्ट्रपति भण्डारीले जुन व्यवहार तत्कालीन प्रधानमन्त्री एवं आफ्नो पूर्वपार्टी एमालेका अध्यक्ष केपी ओलीलाई गर्थिन त्यही व्यवहार देउवासँग पनि गर्न पुगिन् । पूर्व पार्टी सहकर्मी भएकाले ओलीसँग राष्ट्रपति भण्डारीको भेटघाट अनौपचारिक तथा सघन हुन्थ्यो । ओली र भण्डारीको ट्युनिङ मिलेको थियो । पदीय मर्यादा भन्ने कुराले त्यति महत्वपूर्ण थिएन । तर देउवा नेपाली कांग्रेसका सभापति । कांग्रेसबाट प्रधानमन्त्री बनेका छन् ।

फेरि प्रजातान्त्रिक मुल्य मान्यतामा प्रतिबद्ध देउवा पदीय गरिमा के हो, आफ्नो अधिकार के हो भन्ने एउटा सीमामा बसेका छन् । कार्यकारी अधिकारमा बसेका र प्रजातान्त्रिक मुल्य मान्यतामा हिँडेका प्रधानमन्त्री देउवालाई राष्ट्रपति भण्डारीले आफ्नो पदीय मर्यादा नाघेर आदेशात्मक शैलीमा पत्र दिएकी छन् । देउवालाई ओलीजस्तै सम्झेर व्यवहार गर्दा राष्ट्रपति भण्डारीलाई महंगो परेको छ ।

संवैधानिक आलंकारिक राष्ट्रपतिले आफ्नो पदीय सीमा नाघेर कार्यकारी प्रमुख प्रधानमन्त्रीलाई निर्देशनात्मक पत्र दिएपछि चौतर्फी आलोचना सुरु भएको छ । सरकारले संविधान र कानुन बाझिएकाले यसलाई व्यवस्थित गरेर कानुनी अड्चन नआउने गरी आसन्न निर्वाचनको तयारी गरिरहेका बेला राष्ट्रपति भण्डारीले सीमा नाघेर स्थानीय चुनाव नसार्न शीतल निवास बोलाएर निर्देशनात्मक पत्र थमाएपछि राष्ट्रपतिको भूमिकामाथि फेरि प्रश्न उठेको छ । यो संविधानविपरीत भन्दै सत्तारुढ गठबन्धनले राष्ट्रपति भण्डारीको कडा आलोचना गरेको छ ।

राष्ट्रपति भण्डारीले प्रधानमन्त्रीलाई स्थानीय तह निर्वाचन नसार्न लिखित रुपमै दिएको पत्र शनिबार सत्ता गठबन्धनको बैठकमा बाडिएको थियो । पत्रमा स्थानीय तह निर्वाचन ऐन संशोधन गर्ने सरकारी तयारीलाई चिन्ताजनक भनेकी छन् । राष्ट्रपतिले प्रधानमन्त्रीलाई पत्र दिनु असंवैधानिक भएको भन्दै गठबन्धनका नेताहरुले विरोध गरेका छन् ।

राष्ट्रपतिले राजनीति गर्न खोजेको र यसको पछाडि एमालेको हात रहेको गठबन्धनका नेताहरुको ठहर छ । एमालेले एकातिर निर्वाचन आयोगमा आफ्नो मान्छे लगेर सरकारलाई बदनाम गराउने र अर्कोतिर संविधान विपरित राष्ट्रपतिलाई परिचालन गरेर गठबन्धनमा दबाब बढाउन खोजेको भन्दै नेताहरुको आपत्ति छ ।