काठमाडौं : न्याय परिषद्ले काठमाडौं जिल्ला अदालतका न्यायाधीश राजकुमार कोइराला र अधिवक्ता रुद्र पोखरेलबीच मुद्दाको विषयलाई लिएर भएको घुस प्रकरणबारे छानविन गर्न समिति गठन गरेको छ।
बुधबार बसेको न्याय परिषद्को बैठकले उक्त बिषयमा छानविन गर्न न्यापरिषद्का सदस्य रामप्रसाद श्रेष्ठको नेतृत्वमा तीन सदस्यीय छानबिन समिति गठन गर्ने निर्णय गरेको हो।
छानविन समितिमा उच्च अदालत पाटनका कायम मुकायम मुख्य न्यायाधीश महेशप्रसाद पुडासैनी र न्यायाधीश महेश शर्मा पौडेल रहेका छन्। समितिलाई ४५ दिनभित्र छानबिन गरी प्रतिवेदन बुझाउनुपर्ने समयसीमा तोकिएको न्यायपरिषद् सचिवालयका प्रवक्ता मानबहादुर कार्कीले जानकारी दिए।
छानविन समिति गठन भएसँगै न्यायाधीश कोइरालालाई कार्यसम्पादनमा रोक लगाइएको छ। कोइरालाले जहाँ दरबन्दी छ, त्यहीबाट तलब बुझ्ने तर कुनै काम गर्न नपाउने प्रवक्ता कार्कीले बताए।
न्यायाधीश कोइराला र अधिवक्ता पोखरेलबीच व्यवसायी इच्छाराज तामाङलाई धरौटीमा छुटाउनका लागि घुस लेनदेनको अडियो वार्ता सार्वजनिक भएपछि बुधबार परिषद्को बैठक बसेको हो।
कोइरालाले भने समाजिक सञ्जालमार्फत आफूले अनुचित कार्य नगरेको दाबी गर्दै छानविन गर्न माग गर्दै यसमा आफ्नो पूर्ण सहयोग हुने बताए।
