माधव नेपालको प्रश्न
काठमाडौं । सत्ताघटक दल नेकपा एकीकृत समाजवादीका अध्यक्ष माधवकुमार नेपालले स्टेट पार्टनरसीप प्रोग्राम (एसपीपी) रद्द गरेको पत्र अमेरिकी सरकारलाई पठाउन अलमल भएको बताएका छन् ।
विश्वको भूराजनीतिक तनाव र नेपालको परिस्थिति विषयक बहसमा पूर्वप्रधानमन्त्री समेत रहेका नेपालले एसपीपी नेपालले स्वीकार नगर्ने पत्र अमेरिकालाई पठाउन प्रधानमन्त्रीलाई आग्रह गरिएको बताए।
‘तत्कालीन सरकारबाट एसपीपी सम्झौता भइसकेको रहेछ । नेपालले चिट्ठी पठाएको रहेछ । त्यो पनि नेपाली आर्मीले पठाएको रहेछ । कम्युनिस्ट पार्टीको प्रधानमन्त्रीको स्वीकृतिमा एसपीपी पठाएको रहेछ । विडम्बना होइन । त्यसपछि हामीले प्रधानमन्त्री शेरबहादुर देउवालाई दबाब दियौं । दबाब दिइसकेपछि त्यसलाई स्वीकार नगर्ने कुरा भएको छ । अहिले फेरि अलमलका कुरा आइरहेका छन् । अस्ति भर्खर मात्रै हामी एसपीपी पत्र अमेरिकालाई पठाउनुस् भनेका थियौं । ढिलो हुने काम नहोस् । नेपालको राष्ट्रियता रक्षा गर्ने भनेको नेपाली जनताले हो । ‘
उनले पश्चिमा शक्ति र दक्षिणको प्रभावमा एमाले रहेको बताए । नेपालले भने,’कम्युनिस्ट पार्टी नै प्रधानमन्त्री भएको बेला एमसीसी नेपाल भित्र्याइयो । पाँच दलीय गठबन्धनको हातमा सत्ता पुग्यो । र, एमसीसी यथास्थीतिमा पास हुन सक्दैन भन्ने हाम्रो माग थियो । र, अन्ततः सैन्य गठबन्धनसहितको एमसीसी मान्दैनौं भनेर व्याख्यात्मक घोषणासहित एमसीसी पास भएको हो ।’
