काठमाडौं। सेयर कारोबारको दोस्रो दिन सोमबार नेप्से परिसूचक ५४.४५ अंकले बढेको छ।
नेप्से ५४.४५ अंकले बढेर २१३२.९६ विन्दुमा पुगेको छ। दोहोरो अंकले बढेको सेयर बजारमा आइतबारको तुलनामा कारोबार रकम पनि वृद्धि भएको छ। नेप्सेसँगै कारोबार रकम बढेपछि लगानीकर्ताहरु खुसी भएका छन्।
मौद्रिक नीति सार्वजनिक पछिको पहिलो कारोबार दिन आइतबार सेयर बजारमा हरियाली छाएको थियो। मौद्रिक नीतिले सेयर बजारमा सकारात्मक प्रभाव छोडेपछि बजार अब लयमा फर्किने आशमा लगानीकर्ता रहेका छन्। आज ४ अर्ब बढीको सेयर कारोबार भयो। आइतबार २ अर्ब ७३ करोड बराबरको कारोबार भएको थियो।
यसदिन २१४ कम्पनीको ९९ लाख १४ हजार ४८ कित्ता सेयर ४ अर्ब १० करोड ६८ लाख १८ हजार ९४१ रुपैयाँमा खरिदबिक्री भयो।
कारोबारमा आएका १३ वटै समूहको सूचक उकालो लागेको छ। फाइनान्स समूहको सूचक सर्वाधिक ७.९ प्रतिशतले बढ्दा डेभलपमेन्ट समूहको ५ प्रतिशतले बढ्यो। यस्तै मनु एन्ड प्रो र माइक्रो फाइनान्स समूहको ३ प्रतिशत बढीले सूचक उकालो लाग्यो।
ट्रेडिङ, होटल्स एन्ड टुरिजम,लाइफ इन्स्योरेन्स र इन्भेस्टमेन्ट समूहको सूचक २ प्रतिशत बढिले बढ्दा बैंकिङ र नन लाइफ इन्स्योरेन्स समूहको १ प्रतिशत बढिले बढ्यो। कारोबार रकमका आधारमा शिवम् सिमेन्ट अग्रस्थानमा रह्यो। सो कम्पनीको १५ करोड बढीको सेयर खरिदबिक्री भयो।
यसदिन १० कम्पनीको सेयर सकारात्मक सर्किट लेभलमा कारोबार भयो भने १० कम्पनी बढीको ९ प्रतिशत बढिले मूल्य बढ्यो।
Discussion about this post