काठमाडौं,२९ साउन । उपत्यका ट्राफिक प्रहरी कार्यालयले मादक पदार्थ सेवन गरेर स्कुल बस चलाउने ६ जना चालकलाई कारवाही गरेको छ । आइतबार बिहान साढे ५ बजेदेखि साढे ८ बजे सम्म गरिएको चेकजाँचमा मापसे गरेका चालक कारवाहीमा परेका हुन् ।
मापसे गरेर स्कुल बस चलाउने चालकहरूमा बा ३ क ९३५ नम्बरको ओमेगा सेकेण्डरी स्कुल कुमारी पाटीका बस चालक ईन्द्र बहादुर श्रेष्ठ , बा १ क ९४५६ नम्बरको टाइम इन्टरनेश्नल कलेजका बस चालक राज कुमार श्रेष्ठ र बा १ क ९३५६ नम्बरको त्रियोग हाइ स्कुलका बस चालक साङ्गेल शेर्पा रहेका छन् ।
त्यस्तै, बा ८ च ९३८३ नम्बरको रेडियन्ट पब्लिक स्कुलका चालक शिव कुमार क्षेत्री , बा १८ च ९८०१ नम्बरको ओरेन्ट इष्ट मन्टेश्वरी स्कुल बल्खुका चालक मनोज महर्जन र निटिज बोर्डिङ स्कुल कुपण्डोलका चालक भिमसेन नेपाली रहेका छन् । ट्राफिक प्रहरीको नियमित चेकिङमा अन्य ट्राफिक नियम उल्लंघन गर्ने ८ जना स्कुल बसका चालक समेत कारवाहीमा परेका छन् ।
मदिरा पिएर स्कुल बस चलाउने चालकलाई नियन्त्रणमा लिइ नियम अनुसार कारवाही गरेर सम्बन्धित स्कुललाई जानकारी गराइएको प्रहरीले जनाएको छ। अर्को चालकमार्फत विधार्थीलाई गन्तव्यमा पठाइएको काठमाडौं उपत्यका ट्राफिक प्रहरी कार्यालयका प्रवक्ता एवं प्रहरी वरीष्ठ उपरीक्षक राजेन्द्र प्रसाद भट्टले जानकारी दिए।
काठमाडौं उपत्यका ट्राफिक प्रहरी कार्यालयले गएको साउन ८ गते देखि स्कुल बस चेक जाँच गर्ने अभियान संचालन गर्दै आएको छ ।
हालसम्म १ सय १७ वटा स्कुल बसका चालकहरू कारबाहीमा परिसकेका छन । जसमध्ये मादक पदार्थ सेवन गरेर स्कुल बस चलाउने २२ वटा र अन्य ट्राफिक नियम उल्लघंन गर्ने ९५ वटा स्कुल बसका चालकलाई ट्राफिक प्रहरीले कारवाही गरिसकेको छ ।
Discussion about this post