१० जना केन्द्रीय सदस्य मनोनित गर्दा देउवाले दिए तीन नेतालाई भाग

नेपाली काँग्रेस सभापति शेरबहादुर देउवाले १० जना महिला केन्द्रीय सदस्य मनोनित गरेका छन् । केन्द्रीय कमिटीमा महिला सहभागिता ३३ प्रतिशत पुर्याउन देउवाले मंगलबार १० जना केन्द्रीय सदस्य मनोनित गरेका हुन् ।

काँग्रेस केन्द्रीय समितिमा यसअघि ४३ जना महिलाको उपस्थिति थियो । अब १० जना थपिएका छन् । १० जना महिला केन्द्रीय सदस्य मनोनित गर्दा सभापति देउवाले शेखर कोइराला, प्रकाशमान सिंह, कृष्णप्रसाद सिटौला र शशांक कोइराला निकटलाई पनि समेटेका छन् । यसअघि पार्टीमा एकलौटी गरेको आरोप खेप्दै आएका देउवा मंगलबार शेखर पक्षबाट २ , प्रकाशमान, सिटौला र शशांक निकट १–१ जनालाई केन्द्रीय सदस्य मनोनित गरेका हुन् । मनोनित हुनेमा केन्द्रीय सदस्यमा पराजित हुनेदेखि क्षेत्रीय सभापतिमा पराजितसम्म समेटिएका छन् ।

शेखर कोइराला निकट किरण यादव १४ औं महाधिवेशनमा केन्द्रीय सदस्यमा पराजित भएकी थिइन् भने शशांक कोइराला निकट उर्मिला थपलिया पनि केन्द्रीय सदस्यमा पराजित भएकी थिइन् । नेविसंघकी पूर्वमहामन्त्री थपलियालाई शेखर समूहले टिमबाट हटाएको थियो । देउवाले शेखर पक्षकी यादव र रुक्मिणी कोइरालालाई केन्द्रीय सदस्यमा मनोनित गरेका छन् ।

यस्तै नेता कृष्णप्रसाद सिटौला निकट धना खतिवडालाई पनि देउवाले केन्द्रीय सदस्य मनोनित गरेका छन् । महिला संघकी निवर्तमान महासचिव खतिवडाले महिला संघको अध्यक्षमा आकांक्षा राखेकी थिइन् । महिला संघको अध्यक्षमा उषा राउत मिश्रलाई मनोनित गरेका देउवाले खतिवडालाई केन्द्रीय बनाएका छन् ।

राध घले सभापति देउवा निकट हुन् भने कल्याणी रिजाल प्रकाशमान सिंह निकट हुन् । गोमा भट्टराई, गंगा शाही, लक्ष्मी खतिवडा र  सीता देवकोटा संस्थापन पक्ष निकट हुन् । खतिवडा सुनसरी क्षेत्र नम्बर १ को सभापतिमा पराजित भएकी थिइन् । गंगा शाही गृहमन्त्री बालकृष्ण खाणको सिफारिसमा केन्द्रीय सदस्य भएको बुझिएको छ । घले बागमती प्रदेश काँग्रेसकी मुख्य सचेतक हुन् भने शाही रुपन्देही महिला संघकी अध्यक्ष थिइन् । गोमा भट्टराई केन्द्रीय सदस्यमा पराजित भएकी थिइन् । रिजालले महिला संघमा लामो समय काम गरेकी थिइन् ।