उत्तर कोरियाली नेता किम जोङ उनले कृषि उत्पादनमा ‘क्रान्तिकारी परिवर्तन’ गर्न निर्देशन दिएका छन् । उत्तर कोरियाले खाद्य संकटको सामना गरिरहेको समाचार सार्वजनिक भएका बेला नेता किमले अधिकारीहरूलाई कृषि उत्पादन बढाउन निर्देशन दिएका हुन् ।
कोरियन सेन्ट्रल न्युज एजेन्सीका अनुसार वर्कर्स पार्टी अफ कोरियाको बैठकमा किमले कृषिमा ‘स्थिर र दिगो उत्पादन गर्न निर्देशन दिएका हुन् ।
नेतृत्वमा इच्छाशक्ति भने केही पनि असम्भव नभएको उल्लेख गर्दै किमले पार्टी एकताबद्ध भएर कृषि उत्पादनमा परिवर्तन ल्याउन सकिने बताएका हुन् । दक्षिण कोरियाली एकता मन्त्रालयले छिमेकी मुलुक उत्तर कोरियाले ‘गम्भीर खाद्य संकट’ निम्तिने बताएपछि किमको भनाइ आएको हो । मन्त्रालयले उत्तर कोरियामा भोकमरीले केही व्यक्तिको मृत्यु भएको रिपोर्टसमेत प्रकाशित गरेको थियो ।
गत महिना अमेरिकाबाट सञ्चालित ‘थिंकट्यांक’ समूह ३८नर्थले २०२१-२२ को उत्पादनले उत्तर कोरियामा आधारभूत मानवीय आवश्यकता पूरा गर्न पनि नसकेको र मुलुक भोकमरीको गम्भीर संकट आएको बताएको थियो। उक्त समूहले उत्तर कोरियाली जनताको जीवनस्तर खस्किएको र खाद्य असुरक्षाले जटिल मानवीय संकट निम्तिएको बताएको थियो ।
उत्तर कोरियाले पटक-पटक खाद्य संकटको सामना गर्दै आएको छ । सन् १९९० को दशकको खाद्य संकटले उत्तर कोरियामा २ लाख ४० हजारदेखि ३५ लाखसम्म व्यक्तिको मृत्यु भएको हुन सक्ने अनुमान गरिएको थियो । अहिलेको खाद्य संकट भने उत्पादनमा कमी र मौसममा खराबी आएकाले निम्तिएको बताइएको छ ।
त्यस्तै कोरोना महामारीका कारण गरिएको लकडाउन र चीनसँगको घट्दो व्यापारले पनि खाद्य संकट निम्तिएको अन्तर्राष्ट्रिय सञ्चारमाध्यमले जनाएका छन् । गत हप्ता उत्तर कोरियाको सरकारी अखबार रोदोङ सिनमुनले मुलुक आत्मनिर्भरको बाटोमा जानुपर्ने बताएको थियो । उसले ‘साम्राज्यवादी’ को सहयोग लिन नहुनेमा जोड दिएको थियो ।
Discussion about this post