हिरा, सुनका गहना र विभिन्न किसिमका पत्थरहरूसहित चितवन प्रहरीले ३ भारतीय नागरिकलाई पक्राउ गरेको छ । उनीहरू चढेर आएको भारतीय नम्बर प्लेटको कार पनि प्रहरीले नियन्त्रणमा लिएको छ ।
चितवन प्रहरीले बुधबार दिउँसो भरतपुरको जिल्ला प्रहरी कार्यालय परिसरमा पत्रकार सम्मेलन राखेर बरामद भएका गहना, कार र नियन्त्रणमा लिएका व्यक्तिहरू सार्वजनिक गरेको हो । सुन जस्तो देखिने विभिन्न प्रकारका ११ थान गहना, हिरा जस्तो देखिने ७ थान गहना र ३६ थान विभिन्न खाले पत्थरहरूसहित मंगलबार राति १ बजे उनीहरूलाई महेन्द्र राजमार्गको भरतपुर महानगरपालिका-१२ गोन्द्राङबाट नियन्त्रणमा लिएको चितवन जिल्ला प्रहरी कार्यालयका प्रवक्ता डिएसपी विजयराज पण्डितले जानकारी दिए ।
भारतीय कारबाट अवैध ढंगले गरगहना ओसारपसार हुन लागेको सूचनाका आधारमा जाँच गर्दा डब्लुबी १२ एभी ५५६६ नम्बरको कारबाट ती सामग्रीहरू फेला परेका हुन् । चितवनका सुनचाँदी व्यवसायीलाई देखाउँदा ती सामग्री सुन र हिराका भएको एकीन गरेकाले मूल्य निकालिएको डिएसपी पण्डितले बताए । सुनका गहना ६३ तोलाभन्दा धेरै र हिराका गहना २२ तोलाभन्दा धेरैका छन् ।
चालक बस्ने सिटको पछाडिको सिटमुनि, गियर बक्स र एयर फिल्टरभित्र लुकाएर ती सामग्रीहरू ल्याएको पण्डितले बताए । भारत पश्चिम बंगाल राज्यको कोलकाताट गहनाहरू काठमाडौं लैजाँदै गरेको प्रारम्भिक अनुसन्धानमा खुलेको डिएसपी पण्डितले बताए । पक्राउ पर्नेमा कारका चालक भारत उत्तर प्रदेश राज्य, बलिया जिल्ला फेफना थानाका ४२ वर्षीय विनोदप्रसाद, भारत पश्चिम बंगाल राज्यका हौंडा जिल्ला गोलाबाडी थाना सल्किया स्कुल रोड कोलकाता बस्ने ४२ वर्षका नरेश बर्मा र ५१ वर्षका गणपतकुमार तोसावर रहेका छन् ।
बरामद गहना बारा पथलैयामा रहेको राजस्व अनुसन्धान कार्यालयको जिम्मा लगाउने चितवन प्रहरीले जनाएको छ । थप अनुसन्धान र कारबाही प्रक्रिया सोही कार्यालयले अगाडि बढाउने डिएसपी विजयराज पण्डितले जानकारी दिए ।
Discussion about this post