जनादेशविपरीत षडयन्त्र गरेर आर्जेको सत्ता चरम अहंकार र घमण्डले गुमेसँगै छटपटाइरहेको एमाले पंक्तिले नयाँ गठबन्धनविरुद्ध अर्को षडयन्त्र थालेको छ ।
एमालेले संगठित रुपमा ८ दलीय गठबन्धनमा अविश्वास पैदा गर्न सिंगो संगठनलाई परिचालन गरेको छ । एमाले नेता कार्यकर्ताले माओवादी नेतृत्वको सरकारलाई कांग्रेसले समर्थन नगर्ने र प्रधानमन्त्री पुष्पकमल दाहाल प्रचण्ड अल्पमतमा पर्ने भन्दै दुष्प्रचार गरेका छन् ।
कतिसम्म भने एमालेजनहरुले राष्ट्रपति चुनावलगत्तै कांग्रेस सभापति शेरबहादुर देउवाको सरकार बन्ने र प्रचण्ड एक्लिने भन्दै सत्ता गुमाएको झोंकमा नयाँ गठबन्धनमा अविश्वास पैदा गराउने प्रयत्नमा लागेका छन् ।
तर कांग्रेस सभापति देउवासहित सिंगो पार्टी पंक्ति ८ दलीय सहमतिको स्पिरिटबाट दायाँबायाँ नहुनेमा प्रतिबद्ध देखिएको छ । सभापति देउवाले पार्टीका युवा नेता विकाशकुमार ठाकुरसँगको भेटमा प्रचण्डलाई सहमतिविपरीत नचलाउने र सहमतिबाट दायाँबायाँ नहुने प्रष्ट पारेका हुन् ।
‘धारा ७६(३) जाने भन्ने एमालेको प्रपञ्च हो । माओवादीसँग सम्बन्ध बनाएर अघि बढ्छौं । प्रचण्डजीले आफ्नो कार्यकाल पूरा गर्छन् । पाँचै वर्ष सरकार चल्छ । त्यसमा कांग्रेसका मन्त्रीहरुले देश र जनताकफ पक्षमा राम्रो काम गर्छन्,’ उनले बुढानिलकण्ठस्थित निवासमा ठाकुरसित भने । कांग्रेस ८ दलीय गठबन्धनको सहमतिबाट दायाँबायाँ नहुने देउवाको भनाइ रहेको नेता ठाकुरले जानकारी गराए ।
एमालेले प्रपञ्च रचेको कुरा सभापति देउवाले प्रधानमन्त्री प्रचण्डलाई पनि जानकारी गराइसकेको र प्रचण्ड ढुक्क रहेको युवा नेता ठाकुरले बताए । ‘कांग्रेसबाट धोका हुँदैन भन्नेमा प्रचण्डजी पहिलेदेखि नै विश्वस्त हुनुहुन्छ । बीच केही कुरा नमिलेर एमालेसँग जानुभयो । अहिले फर्किएर आउँदा कोर्स करेक्सन भएको छ । उहाँ अब आफ्नो कार्यकाल ८ दलीय गठबन्धनबाट गर्नुहुन्छ । कांग्रेसले इमान्दारिताका साथ सहकार्य गर्छ,’ सभापति देउवासँग भेटेर फर्केपछि नेता ठाकुरले भने ।
कांग्रेस महामन्त्री गगनकुमार थापाले पनि अब सबै दलहरू गठबन्धनमा भएको सहमतिअनुरुप इमानदार भएर अघि बढ्ने बताए । केन्द्र र सातै प्रदेशमा कांग्रेससहित आठ दलको गठबन्धनको सरकार बन्ने भन्दै थापाले जनतामा भरोसा जगाउनेगरी काम गर्नुपर्ने चुनौतीलाई आत्मसात गरेर अघि बढ्ने बताएका छन् ।
Discussion about this post