काठमाडौं । काठमाडौं उपत्यकाका १८ मेयरमध्ये १० जनाले फेरि टिकट पाएका छन् भने ८ ले पाएनन् । टिकट पाएका १० जना मेयरले पुन आफ्नो जित सुनिश्चित रहेको दाबी गरेका छन् ।
काठमाडौं, भक्तपुर र ललितपुर गरी उपत्यकाका तीन जिल्लामा दुई महानगरपालिकासहित १८ नगरपालिका छन् । सोमबार यी सबै नगरपालिकामा उम्मेदवारी दर्ता हँुदा १० जना पुरानै मेयरको उम्मेदवारी दर्ता भएको निर्वाचन कार्यालयले जनाएको छ । २०७४ सालमा मेयरमा जितेका १८ मध्ये १० जनाले पुनः मेयरमा दोहोरिने अवसर पाए भने बाँकी आठ जना दोहोरिन सकेनन् ।
काठमाडौं महानगरका मेयर विद्यासुन्दर शाक्यले दोहोरिने चाहना राखे पनि उनले फेरि टिकट पाएनन् । काठमाडौंमा एमालेले केशव स्थापितलाई मेयरको उम्मेदवार बनाएकाले पनि शाक्यको दोहोरिने चाहनामा बिराम लागेको हो । ललितपुर महानगरका मेयर चिरीबाबु महर्जनलाई भने कांग्रेसले फेरि मेयर उम्मेदवार बनाएको छ ।
ललितपुरको गोदावरी नगरपालिका मेयर गजेन्द्र महर्जनलाई पनि कांग्रेसले फेरि उम्मेदवार बनाएको छ भने महालक्ष्मी नगरपालिकामा रामेश्वर श्रेष्ठले फेरि टिकट पाएनन् । पाँच वर्षअघि उनले एमालेबाट टिकट पाएका थिए । उता भक्तपुरमा चार नगरपालिका छन् । तीमध्ये चाँगुनारायण नगरपालिकामा सोमप्रसाद मिश्रले फेरि मेयर टिकट पाएनन् २०७४ मा उनी एमालेबाट निर्वाचित भएका थिए । तर, सूर्यविनायक नगरपालिकाका मेयर वासुदेव थापालाई भने यसपटक पनि एमालेले मेयरको उम्मेदवार बनाएको छ ।
भक्तपुर नगरपालिकामा नेपाल मजदुर किसान पार्टीका सुनिल प्रजापति पनि फेरि मेयरको उम्मेदवार बन्ने अवसर पाएका छन् । मध्यपुर थिमी नगरपालिकामा पनि एमालेले मदनसुन्दर श्रेष्ठलाई नै फेरि मेयरको टिकट दिएको छ ।
काठमाडौंको कीर्तिपुर नगरपालिकामा मेयर रमेश महर्जनले फेरि मेयरको टिकट पाउन सकेनन् । दक्षिणकालीका मेयर मोहन बस्नेत फेरि उम्मेदवार बनेका छन् । चन्द्रागिरिमा घनश्याम गिरीले पनि फेरि मेयर टिकट पाएका छन् । नागार्जुनमा मोहन बस्नेतले फेरि मेयरमा उम्मेदवारी दिएका छन् । उनीहरू तीनै जनाले कांग्रेसबाट फेरि मेयरको टिकट लिन सफल भएका हुन् ।
तारकेश्वर नगरपालिकामा एमालेले रामेश्वर बोहोरालाई फेरि मेयर उम्मेदवार बनाएको छ । टोखामा प्रकाश अधिकारीले पनि फेरि टिकट पाएका छन् । उनी पनि एमाले हुन् ।
गोकर्णेश्वरका मेयर सन्तोष चालिसे, कागेश्वरी मनोहराका कृष्णहरि थापा, शंखरापुरका सुवर्ण श्रेष्ठ र बुढानीलकण्ठ उद्धव खरेलले भने मेयरका लागि फेरि टिकटका अवसर पाउन सकेनन् । उनीहरू चारै जनाले २०७४ मा एमालेबाट मेयर जितेका थिए । राजधानी दैनिकमा खबर छ ।
