सिरहा । सिरहाको गोलबजार नगरपालिका ९ को शारदा डिस्टिलरी उद्योगले राजस्व छलीका अवैध मदिरा भण्डारण गर्ने माडरस्थित आशिष जनरल स्टोरलाई आन्तरिक राजस्व कार्यालयले सिल गरेको छ । राजस्वको स्टिकर च्यातेर अवैध मदिरा भारतसम्म तस्करी हुँदै आएको थियो । सरकारी निकायले चासो लिएको जस्तो देखाए पनि यसमा संलग्नहरुलाई अनुसन्धानको दायरमा ल्याउने या कारबाहीको प्रक्रिया अघि बढाउने कुनै काम भएको छैन ।
आन्तरिक राजस्व कार्यालय, लहानको टोलीले झन्डै ३४ सय कार्टुन राजस्व छलीका अवैध मदिरा बरामद गर्यो । त्यसपछि आन्तरिक राजस्वले उद्योग र गोदामलाई सिल गरी राजस्व छलीका विषयमा उद्योगका म्यानेजर लोकबहादुर बस्नेत र गोदामका मालिक ललनकुमार यादवलाई नियन्त्रणमा लिएर अनुसन्धान गरिरहेको छ । उद्योगका मालिक प्रमोद गोयन्का र नवीन गोयन्का भने भारततर्फ भागेका छन् ।
उद्योग र गोदाम सम्बद्ध व्यक्तिहरुमाथि अनुसन्धान गरिरहेको आन्तरिक राजस्व कार्यालय लहानका कर्मचारीहरु पनि शंकाको घेरामा छन् । राजस्वका स्टिकर टाँस गर्न उद्योगमा एकजना राजस्वका कर्मचारी नै राख्नुपर्ने कानुनी व्यवस्था छ । तर, कार्यालयले उद्योगलाई नै स्टिकर जिम्मा लगाइदिएको थियो । आफ्नो उपस्थितिमा टाँस गर्नुपर्ने राजस्वका स्टिकर उद्योगलाई नै जिम्मा दिनु र राजस्व छलीका विषयमा सूचना दिँदा पनि अनेक बहाना बनाएर समयमै नआउनुले यसमा उनीहरुको संलग्नतालाई थप प्रस्ट्याउँछ । तर, उनीहरुमाथि अनुसन्धान हुनु त परको कुरा, उनीहरु आफैं यो घट्नाको अनुसन्धान गरिरहेका छन् ।
घटनापछि प्रहरी प्रधान कार्यालयले मधेश प्रदेशका प्रहरी प्रमुख डीआईजी यज्ञविनोद पोखरेल र सिरहाका प्रहरी प्रमुख प्रहरी उपरीक्षक सन्तोष आचार्यलाई स्पष्टीकरण सोध्यो । त्यसबाहेक छानबिनको प्रक्रिया अघि बढेन ।
यति मात्र होइन, यसमा सिरहाका प्रमुख जिल्ला अधिकारी वासुदेव दाहाल, सिरहाका सशस्त्र प्रहरीका प्रमुख सशस्त्र प्रहरी उपरीक्षक शिव गैरे, राष्ट्रिय अनुसन्धान विभाग प्रमुख टीकाप्रसाद पोखरेललगायत पनि शंकाको घेरामा छन् । तर, उनीहरुमाथि पनि छानबिन भएको छैन ।
यस्ता संगठित अवैध धन्दाहरुमा तलदेखि माथिसम्म मिलेमतो हुने भएकाले नाम मात्रको सोधपुछ गरेर ढाकछोप गर्ने परिपाटी हामीकहाँ रहँदै आएको छ । अहिले पनि यस विषयमा निष्पक्ष छानबिन हुन्छ कि मिलेमतोमा उन्मुक्ति दिने काम हुन्छ त्यो भने हेर्न बाँकी छ ।
भारत मदिरा तस्करी प्रकरणमा पक्राउ परेका दुई जनामध्ये एक जनालाई गुपचुप रूपमा रिहा गरिएको तथ्य सार्वजनिक भएको छ ।
त्यसमध्येका यादवलाई शुक्रबार राजस्व कार्यालयले गोप्य रूपमा छाडिदिएको हो । उनलाई धरौटीमा रिहा गरिएको सुनिएपनि आन्तरिक राजस्व र प्रहरीले यसबारे केही सूचना दिएको छैन ।
राजस्व कार्यालयका कर अधिकृत राजेश कुमार साहले यादवलाई रिहा गरिएको बताएपनि धेरै कुरा आफूले भन्न नमिल्ने बताए । कार्यालयका प्रमुख पुन्य रिजालले भने रिहा गरिएको कुरा अस्वीकार गरे ।
यो खबर पढेर तपाईलाई कस्तो महसुस भयो ?
+1
+1
+1
+1
+1
+1
+1
Discussion about this post