सिराहाको धनगढीमाईमा स्कुल निर्माणमा अनियमितता, गुणस्तरहीन सामग्री प्रयोग भएको स्थानीयको गुनासो

धनगढीमाई, सिराहा –
सिराहा जिल्लाको अयोध्यानगर गाविस वडा नम्बर ७ (हालको धनगढीमाई नगरपालिका वडा नम्बर ८) मा निर्माणाधीन विद्यालयमा ठूला अनियमितता भएको स्थानीयबासीहरूले गम्भीर आरोप लगाएका छन्। निर्माण कार्यमा अत्यन्तै गुणस्तरहीन सामग्री प्रयोग गरिएको भन्दै उनीहरूले चिन्ता व्यक्त गरेका छन्।

स्थानीयवासीहरूको भनाइ अनुसार स्कुल निर्माणमा प्रयोग भएको ढलान, इटा, बालुवा र सिमेन्टको गुणस्तर न्यून रहेको छ। बालुवा ठीकसँग चालिएको छैन, सिमेन्टको मात्रा कम र इटा अत्यन्तै कमजोर रहेको दाबी गरिएको छ। यस्ता सामग्री प्रयोगले विद्यालयको दीर्घकालीन सुरक्षामा प्रश्न उठेको छ।

झन अचम्मको कुरा त के छ भने, उक्त निर्माणस्थलमा अहिलेसम्म स्कुलको नाम, लागत, ठेकेदार, निर्माण कम्पनी, इन्जिनियर लगायतका विवरण समेटिएको कुनै पनि बोर्ड समेत राखिएको छैन। सार्वजनिक निर्माण कार्यमा बोर्ड राख्नु कानुनी प्रावधान भए पनि यसमा चरम लापरवाही देखिएको छ। बोर्ड नराखिनु स्वयम् पारदर्शितामा प्रश्न खडा गर्ने विषय बनेको छ।

स्थानीय युवाहरु ले भने, “हामीले स्कुल निर्माणको गुणस्तरप्रति शंका लागेको कारण अवलोकन ग¥यौं। तर जुन ढंगले काम भइरहेको छ, त्यो निसन्देह बालबालिकाको सुरक्षाका लागि खतरनाक छ। न बोर्ड छ, न निगरानी। सब ठेकेदारको मनपरी चलिरहेको छ।”

यसबारेमा वडा कार्यालय तथा नगरपालिका प्रशासन भने मौनजस्तै देखिन्छ। स्थानीयको बारम्बार गुनासोपछि पनि न त निरीक्षण गरिएको छ, न त ठेकेदारलाई कारबाही गरिएको छ।

स्थानीय सामाजिक अगुवाले भने, “यो स्कूल त बच्चाहरूको भविष्य निर्माण गर्ने थलो हो, तर अहिलेको काम हेर्दा त यो दुर्घटना निम्त्याउने थलो बन्ने खतरा देखिन्छ। हामी यसविरुद्ध आन्दोलन गर्ने तयारीमा छौं।”

अब स्थानीय बासिन्दा तथा अभिभावकहरूले सरोकारवाला निकाय तथा समाचारमाध्यमहरू मार्फत चासो व्यक्त गर्दै छानबिनको माग गरिरहेका छन्।

सम्बन्धित निकायले तत्काल अनुगमन गरी दोषीमाथि कारबाही नगरे निर्माण रोक्नुपर्ने आवाज व्यापक बन्दै गएको छ।