टीकापुर, असार ५ गते । कैलालीको टीकापुरमा हात्तीको आक्रमणबाट एक महिलाको ज्यान गएको छ । टीकापुर नगरपालिका–१ ब्लक नं. १५ की ५० वर्षीया टंका सोडारीको ज्यान गएको इलाका प्रहरी कार्यालय टीकापुरले जनाएको छ ।
कर्णाली नदी किनार सनकट्टीघाटमा शनिबार साँझ जंगलबाट निस्केका दुईवटा हात्तीले सोही नदीमा भइरहेको तटबन्धमा मजदुरी गरेर घर फर्किरहेका सोडारीलाई आक्रमण गरेको प्रहरी नायब उपरीक्षक हेमबहादुर शाहीले बताए ।
नदी किनारमा तटबन्धका लागि अन्य तीन महिला ढुंगा सङ्कलन गरिरहेका थिए । एक्कासि दुईवटा हात्तीनजिकै देखेपछि दुई महिला भागे पनि सोडारीलाई हात्तीले लछारपछार गरी, खुट्टा भाँचेर मारेको प्रत्यक्षदर्शीले बताएको प्रहरीले जनाएकोे छ ।
पछिल्लो समय कैलाली, बर्दिया जिल्लामा जंगली जनावरको आक्रमण बढ्दै गएको छ । यसबाट जंगल आसपासमा भएका क्षेत्रमा बर्सेनि दर्जनौँ मानिसको ज्यान जाने गरेको छ ।
Discussion about this post