काठमाडौं । सत्तारुढ गठबन्धनका शीर्ष नेता प्रस्तावित अन्तर्राष्ट्रिय विमानस्थल निर्माणस्थलको निरीक्षण गरेका छन्। शनिबार प्रधानमन्त्री शेरबहादुर देउवासहित नेकपा माओवादी केन्द्रका अध्यक्ष प्रचण्ड, नेकपा एकीकृत समाजवादीका अध्यक्ष माधव नेपाल, अर्थमन्त्री जनार्दन शर्मा, जनता समाजवादी पार्टीका अध्यक्ष उपेन्द्र यादवलगायतका नेता स्थलगत निरीक्षण गरेका हुन् ।
सरकारी टोली विमानस्थल निर्माणस्थलको स्थलगत निरीक्षण र हालसम्मको प्रगतिबारे जानकारी लिएर काठमाडौं फर्किनेछ।
सर्वोच्च अदालतले न्यून वातावरणीय क्षति हुने गरी र वातावरणीय प्रभाव मूल्यांकन (ईआईए) गराएर मात्र विमानस्थल बनाउन विकल्प दिएपछि गठबन्धनका नेताहरु निजगढ गएका हुन्। पाँच न्यायाधीशले बुधबार फैसलाको पूर्ण पाठ सार्वजनिक गर्दै विमानस्थल निर्माणको सन्दर्भमा विश्लेषण र निष्कर्षका साथ छुट्टाछुट्टै राय व्यक्त गरेका थिए। सर्वोच्चको बृहत पूर्ण इजलासको बहुचर्चित फैसलामा तीन न्यायाधीश र दुई न्यायाधीशको राय फरक छ।
न्यायाधीशले विमानस्थल निर्माणको लागि उपयुक्त स्थान निर्धारण भएपछि सो क्षेत्रमा वातावरणीय प्रभाव मूल्याङ्कन गर्दा वातावरणमा पर्ने प्रतिकूल प्रभावलाई न्यूनीकरण गर्ने प्रर्याप्त व्यवस्था गर्नू र प्रभावित हुने देखिएका आस्रित वन्यजन्तुको वासस्थान, विचरण तथा अन्य गतिविधिलाई असर नपुग्ने गरी उपयुक्त पूर्वाधारको निर्माण र विकास गरी वन्यजन्तु संरक्षणको उचित व्यवस्था गर्नुपर्ने राय दिएका छन्।
Discussion about this post