पर्सा, साउन ७ गते । पर्सामा टाटा सुमो चालकले वृद्धलाई ठक्कर दिएर फरार भएपछि पक्राउ परेका छन् ।
पक्राउ पर्नेमा टाटा सुमोका चालक पर्साको बहुदरमाई नगरपालिका वडा नं. ७ विश्रामपुर टोलका २१ वर्षीय अलाउदिन अन्सारी रहेको प्रहरीले जनाएका छन् । बिहिवार अन्सारीले चलाएको ना १ ज १९२१ नम्बरको टाटा सुमोले वीरगञ्ज महानगरपालिका २४ स्थित स्थानीय ७० वर्षीय वृद्ध शिवदयाल राउन अहिरलाई ठक्कर लागेको थियो ।
टाटा सुमोको ठक्करबाट वृद्ध घाइते भएपनि उनलाई अस्पताल नलगि छटपटाइरहेको अवस्थामा छाडेर चालक अन्सारी सुमोसहित फरार भएका थिए। वृद्धलाई उपचारको लागि नारायणी अस्पतालमा पठाइएकोमा दुर्घटनाको भोलिपल्ट मृत्यु भएको थियो।
प्रहरीले खोजतलास गर्ने क्रममा चालक अन्सारीलाई वीरगञ्ज १९ विन्दवासिनी चोकबाट गाडीसहित नियन्त्रणमा लिएको प्रहरी प्रवक्ता प्रहलाद कार्कीले जानकारी दिए ।
