कर छलीको आशंकामा धनगढीको समैजी स्टोरमा राजश्वको छापा

कर छलीको आशंकामा धनगढीको चौराहास्थित समैजी स्टोरमा आन्तरिक राजश्व कार्यालयले छापा मारेको छ । एउटै फर्म अन्तरगत विभिन्न कारोबार हुँदै आएको समैजी स्टोरमा आन्तरिक राजश्व कार्यालय धनगढीले बुधबार छापा मारेको हो ।

राजश्व कार्यालय धनगढीका सूचना अधिकारी दुर्गा प्रसाद पौडेलले करसम्बन्धी शंकास्पद गतिविधि हुँदै आएको देखिएकाले छापा मारेर अनुसन्धान कार्य भइरहेको जानकारी दिए । उजुरीको आधारमा अनुसन्धान कार्य भइरहेको बताउँदै उनले हाल स्टोक बुक भिडाउने भइरहेको जनाए ।

सो स्टोरले किराना सामानसँगै अन्य बस्तुको कारोबार हुँदै आएको छ । उनले भने, ‘एउटै व्यक्तिको नाममा धेरै कारोबार भएको देखिएको छ । किरानासँगै ग्यास, भाँडाबर्टन, ईटा, बिल्डर्सलगायतको कारोबार भएको भन्ने कुरा आएको छ । हामी बिहान १० बजेदेखि स्टोक हेर्ने कामै छौँ । २ दिनसम्म लाग्छ, त्यसपछि वास्तविकता बाहिर आउँछ ।’