विवाहपञ्चमी महोत्सवको पाँचौं दिन आज जानकीको मटकोर

सप्ताहव्यापी विवाहपञ्चमी महोत्सव अन्तर्गत आज पाँचौं दिन जानकीको मटकोर रहेको छ । आज दिउँसो जानकी मन्दिरबाट बाजागाजासहित पुगेर ऐतिहासिक गंगासागरमा मटकोर गरिने कार्यक्रम छ।

मिथिलाको परम्परागत प्रचलनअनुसार गंगासागरमा मटकोर गरिन्छ। मटकोरमा जानकीको प्रतीकका रूपमा बालबालिकालाई सहभागी गराई परम्परागत विधिअनुसार पूजा–अर्चना गरिन्छ। साथै, उपस्थिति सयौँ नरनारीले मटकोर गीत गाउने गर्छन्। यसै अवसरमा गंगासागरमा दैनिक साँझ आयोजना हुने गंगा महा आरती आज दिउँसो नै सम्पन्न गरिनेछ।
मटकोर सम्पन्न भएपछि भोली शुक्रबार राम र जानकीको डोला फेर गरी सयोम्बर र विवाह समारोह आयोजना गरिनेछ।

मंसिर १६ गते विधिवत रूपमा सुरु भएको विवाहपञ्चमी महोत्सवअन्तर्गत पहिलो दिन नगरदर्शन, दोस्रो दिन फुलबारी लीला, तेस्रो दिन धनुष यज्ञ, र चौथो दिन तिलकोत्सव सम्पन्न भइसकेका छन्।
भोली छैठौँ दिन विवाहपञ्चमीको प्रमुख कार्यक्रम सम्पन्न गरिनेछ। शनिबार अयोध्याबाट आएका जन्ती र साधुसन्तको बिदाइ (राम कलेवा) गरी यो ऐतिहासिक महोत्सवको विधिवत समापन हुनेछ।