डोनाल्ड ट्रम्पको शपथ ग्रहणमा को-को विशिष्ट विदेशी पाहुनाहरू सहभागी हुँदैछन् ?

काठमाडौं । डोनाल्ड ट्रम्पले जनवरी २० मा फेरि राष्ट्रपतिको कार्यभार सम्हाल्दैछन्। अमेरिकी नवनिर्वाचित राष्ट्रपतिले सत्ता हस्तान्तरण समारोहमा विदेशी नेताहरूलाई स्वागत गर्ने यो पहिलो पटक हो।

यसअघि अमेरिकामा यस्तो भएको थिएन । ट्रम्पले इटाली, अर्जेन्टिना, चीन र जर्जियाका राष्ट्रपतिहरूलाई समारोहमा सहभागी हुन आमन्त्रण गरेका थिए।

ट्रम्पको सपथ ग्रहण समारोहमा को–को सहभागी हुने भन्ने विषयमा निकै चर्चा चलेको थियो । जसका राष्ट्र प्रमुखलाई आमन्त्रण गरिएको छ, ती देशहरूप्रति ट्रम्पको नीति उदार हुने पनि देखिएको छ ।

इटालीकी प्रधानमन्त्री जर्जिया मेलोनी सोमबार ट्रम्पको सपथ ग्रहण समारोहमा सहभागी हुनेछिन् । मेलोनी युरोपका उच्च प्रोफाइल नेताहरू मध्ये एक हुन् जसलाई ट्रम्पले आफ्नो सपथ ग्रहण समारोहमा भाग लिन आमन्त्रित गरे।

इटालियन प्रधानमन्त्रीको कार्यालयले सपथ ग्रहण समारोहमा मेलोनी सहभागी भएको पुष्टि गरेको छ ।

अर्जेन्टिनाका राष्ट्रपति जाभियर मिलिलाई पनि निमन्त्रणा गरिएको छ । ट्रम्पको सपथ ग्रहण समारोहमा अर्जेन्टिनाका राष्ट्रपति पनि सहभागी हुनेछन् । नोभेम्बर ५ मा भएको निर्वाचनमा जितेपछि ट्रम्पलाई भेट्ने मिली पहिलो अन्तर्राष्ट्रिय नेता थिए ।

पश्चिमा समर्थक नेता जर्जियाका राष्ट्रपति सलोमे जोराबिचभिली पनि ट्रम्पको सपथ ग्रहण समारोहमा सहभागी हुनेछन् । सलोमेमाथि जर्जियामा भएको राष्ट्रपति चुनावमा धाँधली गरेको आरोप लागेको थियो ।

अमेरिकी सञ्चारमाध्यमका अनुसार चिनियाँ राष्ट्रपति सी जिनपिङलाई पनि निमन्त्रणा गरिएको थियो तर चीनले आफ्ना उपराष्ट्रपति हान चेङलाई पठाएको छ । शुक्रबार चीनको विदेश मन्त्रालयले हानको अमेरिका भ्रमणको घोषणा गरेको थियो ।

भारतीय पक्षबाट विदेशमन्त्री एस जयशंकर वाशिंगटनमा ट्रम्पको सपथ ग्रहण समारोहमा सहभागी हुनेछन्।