जनकपुरधाम । अविरल वर्षाका कारण जनकपुरधाम उपमहानगरपालिकाभित्रका सबै निजी विद्यालय असोज १९ र २० गते बन्द हुने भएका छन् । लगातारको वर्षाबाट उत्पन्न जोखिम र विद्यार्थी तथा अभिभावकको सुरक्षालाई मध्यनजर गर्दै विद्यालयहरू दुई दिनका लागि बन्द गर्ने निर्णय गरिएको हो ।
निजी विद्यालय सञ्चालकहरूको संगठन एनप्याब्सन जनकपुरधाम र प्याब्सन जनकपुरधामले शनिवार संयुक्त रूपमा सूचना जारी गर्दै विद्यालयहरू अस्थायी रूपमा बन्द रहने जानकारी दिएका छन् । जनकपुरधाम र आसपासका क्षेत्रमा निरन्तर वर्षा भइरहेको छ। सडकका विभिन्न भागमा पानी जम्नुका साथै विद्यालय परिसरमा हिलो र फोहोर बढेको र यातायातमा अवरोध भएको कारण विद्यार्थीहरूको विद्यालय आवतजावत जोखिमपूर्ण बनेको छ ।
एनप्याब्सन जनकपुरधामका नगर अध्यक्ष दीपक कुमार ठाकुर र प्याब्सन जनकपुरधामका नगर अध्यक्ष रविन्द्र कुमार चौधरीले संयुक्त विज्ञप्तिमा भनिएको छ, ‘विद्यार्थी र अभिभावकको सुरक्षालाई सर्वोच्च प्राथमिकता दिँदै असोज १९ र २० गते सबै निजी विद्यालय बन्द राख्ने निर्णय गरिएको हो। यो जनस्वास्थ्य र सुरक्षाको दृष्टिले आवश्यक कदम हो ।’
Discussion about this post