विराटनगर : सुनसरीको इटहरी उपमहानगरपालिका–४ जनता टोलबाट प्रहरीले हतियार र लागुऔषधसहित तीन जनालाई पक्राउ गरेको छ। इलाका प्रहरी कार्यालय इटहरीका डीएसपी खगेन्द्रबहादुर खड्का नेतृत्वको टोलीले इटहरी–४ का १९ वर्षीय धनकुमार राई, २७ वर्षीय टीका राई र इटहरी–५ का २८ वर्षीय धनबहादुर राईलाई पक्राउ गरेको हो।
पक्राउ परेकाहरुको साथबाट मेड इन यूएसए लेखिएको एउटा पेस्तोल, सोही पेस्तोलको म्यागजीन र लेबल नलगाएको २४ एम्पुल लागुऔषध बरामद भएको सुनसरी प्रहरी प्रमुख एसपी सञ्जयसिंह थापाले जानकारी दिए। थापाका अनुसार पेस्तोलसहितका व्यक्तिहरुले लागुऔषध किनबेच गरिरहेको विशेष सूचना प्रहरीमा आएको थियो।
त्यसलगत्तै इलाका प्रहरी कार्यालय इटहरीबाट खटिएको टोलीले तीनै जनालाई पक्राउ गरेको उनले बताए। पक्राउ परेकाविरुद्ध हातहतियार खरखजना र लागुऔष ऐनअन्तर्गतको मुद्दा चलाउन सोमबार अदालतबाट म्याद थप गरेर अनुसन्धानको बाँकी प्रक्रिया अघि बढाइएको एसपी थापाले बताए। तीनै जनालाई प्रहरीले जेठ १३ गते राति ११ बजेतिर पक्राउ गरेको हो।
क्राउ परेकाहरु हतियार र लागुऔषधको कारोबारमा लामो समयदेखि संलग्न रहेको प्रहरीको प्रारम्भिक अनुसन्धानबाट खुलेको छ। धनकुमार र टीकाविरुद्ध यसअघि पनि लागुऔषध ऐनअन्तर्गतको मुद्दा चलेको थियो। दुवै जना २०७८ मंसिर २० गते लागुऔषधसहित टीकाको घरबाट पक्राउ परेका थिए।
डाइजापाम, लुपिजेसिक, फेनारगन र एभिल गरेर १०–१० एम्पुल लागुऔषध बरामद भएपछि प्रहरीले दुवै जनाविरुद्ध मुद्दा चलाएको थियो। सुनसरी अदालतको आदेशअनुसार माघ २७ गते उनीहरु साधारण तारेखमा छुटेका हुन्।
अदालतबाट छुटेपछि दुवै जनाले पुनः कारोबारमै संलग्न भएर लागुऔषध र हतियारको धन्दा चलाइरहेको पाइएको प्रहरीले जनाएको छ। यसअघिको लागुऔषध ऐनअन्तर्गतको मुद्दाको अन्तिम किनारा लाग्न बाँकी छ। मुद्दा अदालतमा विचाराधीन रहेकै अवस्थामा अभियुक्तहरु पुनः हतियार र लागुऔषधसहित पक्राउ परेका हुन्।
Discussion about this post