काठमाडौं । काठमाडौंको जोरपाटी लोसेटारमा मिथेन ग्याससहित निस्किएको पानी र बालुवाको फोहोरा बन्द भएको छ। मंगलबार बिहान १० बजे स्थानीय सन्तवीर लामाको घरमा पानीको बोरिङ खन्ने क्रममा एक्कासि माटो, पानी र बालुवासहितको लेदोको फोहोरा निस्किएको थियो। सो फोहोरा गए राती ३:३० मा बन्द भएको बौद्ध प्रहरीले जानकारी दिएको छ। फोहोराले ठूलो क्षति नगरे पनि माटो र बालुवाको लेदो आकाशतर्फ उड्दा वरपरका १२/१५ घरहरूमा हिलो र लेदो भरिएको प्रहरीले जनाएको छ।
खानी तथा भू–गर्भ विभागका सूचना अधिकारी नारायण बाँस्कोटाका अनुसार पानीसहितको लेदोमा १५ देखि २० प्रतिशतसम्म मिथेन ग्यास निस्किएको थियो।
जोरपाटी चोकदेखि सुन्दरीजल जाने बाटोमा लोसेटारमा स्थानीय सन्तकुमार लामाको साढे ३ तले घर छ । घरमा पानी पुर्याउन लामाले बोरिङ खन्दै थिए । खन्ने क्रममा पानी नभेटिएर उनले २ दिनसम्म ड्रिल गरेका थिए । ३२० फिटमुनि पानी भेटिएको थियो । मंगलबार बिहान पाइप जोड्ने काम भइरहेको थियो । ड्रिल गरेको ठाउँमा पाइप हाल्ने क्रममा ग्याससहितको लेदो पानी निस्किएको थियो । सुरुमा सामान्य लेदो देखिएको थियो । विस्तारै ठूलो फोहोरा छाड्दै घरमाथि पुग्यो । वरिपरि पनि बालुवाको स–सानो कणसहितको पानी छरिएको थियो । घरवरपरका भित्ता, सुकाएका लुगा, पार्किङ गरेका सवारीसाधन सबैतिर लेदो फैलियो ।
सूचना अधिकारी बाँस्कोटाका अनुसार काठमाडौं उपत्यकामा पहिले पानीको तलाउ भएकाले यहाँका विभिन्न ठाउँहरूमा ग्यास संकलन भएर बसेको छ । ग्याससहितको लेदो निस्किएको यो पहिलो घटना भने होइन । बेलाबेला यस्तो घटना भइरहने र केही दिनपछि आफैं बन्द हुने बताए ।
विभागबाट वरिष्ठ भू–गर्भविद् पृथ्वीलाल श्रेष्ठको टोलीले उक्त स्थलको अध्ययन गरेको थियो । टोलीले धेरै ग्यास साँघुरो ठाउँबाट निस्किँदाको परिणाम भएको प्रारम्भिक निष्कर्ष निकालेको छ । बाहिर निस्किएको ग्यास मिथेन रहेको र धेरै आत्तिइहाल्नु पर्ने अवस्था नभएको उनले बताए ।
Discussion about this post