धनुषा । धनुषाको बटेश्वर गाउँपालिका कार्यालयले निजी सवारी भाडामा लिएर मासिक १ लाख २० हजार खर्च गरिरहेको पाइएको छ । प्रमुख प्रशासकीय अधिकृतका लागि गत पुस महिनादेखि दैनिक ४ हजार तथा मासिक १ लाख २० हजार रुपैयाँ भाडा तिर्ने गरी स्कारपियो गाडी भाडामा लिइएको हो ।
प्रमुख प्रशासकीय अधिकृत रोवती प्रसाद पौडेलका अनुसार कार्यालयले आवश्यकताका आधारमा गाडी भाडामा लिएको हो । पुस महिनादेखि मासिक १ लाख २० हजारमा बा.१४ च ९०९३ नम्बरको स्कारपियो भाडामा लिइएको छ।
‘अघिल्लो आर्थिक वर्षकै गाउँसभामा आवश्यक्ता र औचित्यसको आधारमा गाडी भाडामा लिइने निर्णय भएको थियो । त्यसैलाई टेकेर गत पुस महिनादेखि दैनिक ४ हजार दरमा गाडी भाडामा कार्यालयले लिएको छ’ उनले भने ।
यसअघि पनि प्रशासकीय अधिकृत राजगिर महतो र सन्तोष शर्मा कार्यरत रहँदा गाउँपालिकाले गाडी भाडामा लिएर मासिक लाखौं रुपैयाँ खर्च गरेको थियो । २०७९ मा पालिका प्रमुखमा रामअशिष महतो निर्वाचित भएयता प्रशासकीय अधिकृतलाई कानुन विपरीत गाडी सुविधा दिइँदै आएको छ । हाल गाडी भाडामा मात्रै वार्षिक लाखौं रुपैयाँ खर्च भइरहेको छ ।
पालिका अध्यक्ष महतोले विकासे कामहरुको नियमन तथा अनुगमनका लागि गाडी भाडामा लिइएको हो । उनले भने, ‘विकासे कार्यहरु भइरहेका छन् । कार्यालयका कर्मचारीलाई अनुगमनका क्रममा सहज होस् भनेर असारसम्मका लागि गाडी भाडामा लिइएको हो ।’
उनले गाडी हुँदा प्रशासकीय अधिकृत नियमित कार्यालय आउने र कार्य सम्पादन राम्रो भइरहेको दावी गरे ।
तर, कार्यालयका एक कर्मचारीका अनुसार उक्त गाडी प्रमुख प्रशासकीय अधिकृत पौडेलले मात्र प्रयोग गर्ने गरेका छन् । गाडी भाडामा लिँदा त्यसमा इन्धन खर्चको पनि भार बढ्ने गरेको छ । पाँच वटा वडा रहेको बटेश्वर गाउँपालिकाको क्षेत्रफल खासै ठूलो छैन ।
तर मनपरी गाडी भाडामा लिएर गाडी प्रयोग गर्ने गरिएको छ । जसमा पालिकाको वार्षिक आधा करोड भन्दा बढी बजेट नै गाडी भाडा र तेलमा खर्च हुने गरेको छ ।
गत आर्थिक वर्षमा मात्रै गाउँपालिका कार्यालयले इन्धनमा मात्रै ४३ लाख रुपैयाँ खर्च गरेको तथ्यांक फेला परेको थियो । तर, खर्च अनुसार गाउँपालिकाले त्यसको औचित्य पुष्टि गर्न सकेको छैन ।
Discussion about this post