सिरहा, लहान — सगरमाथा चौधरी आँखा अस्पतालको कान विभागमा कार्यरत सीमा मेहतामाथि कार्यालय प्रमुखद्वारा भएको भनिएको हिंसात्मक दुर्व्यवहारको घटना अहिले सार्वजनिक चासोको विषय बनेको छ। पीडित मेहताले दिएको जाहेरीका आधारमा सिरहा प्रहरीले मुद्दा दर्ता गरिसकेको छ र हाल अनुसन्धानको चरणमा रहेको जनाएको छ। तर, घटनासँग जोडिएका गम्भीर प्रश्नहरू अझै अनुत्तरित छन्।
पीडित महिला कर्मचारी सीमा मेहताले कार्यालय प्रमुखबाट निरन्तर मानसिक तथा शारीरिक हिंसाको सिकार भएको आरोप लगाउँदै प्रहरीमा उजुरी दिएकी थिइन्। प्रहरी प्रशासनले अनुसन्धान प्रारम्भ गरे पनि अस्पताल प्रशासनले उल्टै पीडितमाथि नै मानसिक दबाब सिर्जना गर्ने र घटनालाई दबाउने प्रयास गरेको खुलेको छ।
पीडितले आरोप लगाएकी छिन् कि अस्पताल व्यवस्थापनले आन्तरिक रूपमा शक्ति प्रयोग गर्दै उनलाई बयान फिर्ता लिन दबाब दिइरहेको छ। उच्चपदस्थ पदाधिकारीहरू अनुसन्धानमा सहयोग गर्नुको सट्टा आरोपितलाई जोगाउन सक्रिय देखिएका छन्।
अस्पतालमा गम्भीर प्रकृति घटनालाई मध्यनजर गर्दै अस्पतालले नेपाल नेत्र ज्योति संघ जिल्ला शाखाको सभापति सन्तोष चौधरीको नेतृत्वमा ७ सदस्यीय छानबिन समिति गठन गरेको थियो। तर, उक्त समितिको अहिलेसम्मको कार्यशैली र प्रस्तुत विवरणले वास्तविक पीडितको पक्षमा काम गरेको संकेत देखिदैन। समिति निष्क्रिय, कमजोर र प्रभावहीन देखिएको छ।
छानबिन समितिले पीडितसँग छलफल र विवरण सङ्कलन गर्ने काममा ढिलासुस्ती देखाएको र तयार परेको प्रतिवेदनमा तथ्यपरक दृष्टिकोण नरहेको पीडित पक्षको आरोप छ।
घटनामा संलग्न भनिएका डा. विजय चौधरी र अभिषेक रोशनमाथि मुद्दा दर्ता भएपश्चात् प्रहरी अनुसन्धान सुरु गरिएको हो। तर अनुसन्धानको क्रममा ती दुवै व्यक्ति फरार भएका छन्। प्रहरी स्रोतका अनुसार उनीहरू सम्पर्कविहीन छन् र अनुसन्धानमा कुनै पनि प्रकारको सहयोग गरिरहेका छैनन्।
यो अवस्था जिम्मेवार पदमा रहेका व्यक्तिहरूले कानुनी प्रक्रियालाई बेवास्ता गरेको स्पष्ट संकेत हो। यसले कानूनमाथिको अवहेलनालाई दर्शाउँछ।
राजनीतिक पहुँचको आडमा अनुसन्धान प्रभावित
पीडित सीमा मेहताले सार्वजनिक रूपमा आरोप लगाएकी छन् कि आरोपितहरू उच्च राजनीतिक पहुँच भएका व्यक्ति हुन् र त्यसकै कारण प्रहरी प्रशासनले प्रभावकारी अनुसन्धान गर्न सकिरहेको छैन। यद्यपि, प्रहरी स्रोतहरूले अनुसन्धान जारी रहेको दाबी गरेपनि कार्यगत रूपले कुनै ठोस प्रगति नभएको देखिन्छ।
घटनालाई लिएर राष्ट्रिय महिला आयोग, महिला मानव अधिकार रक्षकहरुको रास्ट्रिय संजाल तथा थुप्रै महिला तथा मानव अधिकारका संघ–संस्थाहरूले प्रेस विज्ञप्ति जारी गर्दै सत्य तथ्य बाहिर ल्याउन र दोषीमाथि कानुनी कारवाही गर्न माग गरेका छन्। उनीहरूले घटना गम्भीर भएको भन्दै पीडितको सुरक्षा सुनिश्चित गर्न सम्बन्धित निकायहरूलाई आग्रह गरेका छन्।
सिरहा जिल्लामा यसअघि पनि यस्ता घटनाहरू दबाउने प्रयास हुँदा पीडित महिला आत्महत्या गर्न बाध्य भएका उदाहरणहरू छन्। स्थानीय मानव अधिकारकर्मीहरूका अनुसार, विगत केही वर्षमा न्याय नपाएर आत्महत्या गरेका दुई महिलाको केस अझै नटुङ्गिएको सन्दर्भमा यो घटना पुनः चिन्ताजनक बनेको हो।
पीडित सीमा मेहताले निष्पक्ष छानबिन, तत्काल आरोपितको पक्राउ र घटनामा संलग्न सबै पक्षमाथि कडा कारबाहीको माग गरेकी छन्। उनले आफ्नो शारीरिक तथा मानसिक सुरक्षाको ग्यारेन्टी समेत माग गरेकी छन्।
सगरमाथा चौधरी आँखा अस्पतालभित्र देखिएको यस घटनाले संस्थागत संरचना र प्रशासनिक गैरजिम्मेवारीतालाई उजागर गरेको छ। यदि यसमा शीघ्र निष्पक्ष अनुसन्धान गरी दोषीलाई कारबाही नगरिएमा यस्तो घटनाले आगामी दिनमा कर्मचारी सुरक्षा र महिला अधिकारका दृष्टिकोणले नकारात्मक असर पार्न सक्छ।
Discussion about this post