सिरहा — सिरहा जिल्लाको धनगढीमाई नगरपालिका क्षेत्र अन्तर्गत इलाका प्रहरी कार्यालयको ५०० मिटर वरिपरिका क्षेत्रमा पछिल्लो एक साता भित्र घटेका हत्या, आगजनी, लुटपाट लगायतका जघन्य आपराधिक घटनाले सम्पूर्ण जिल्लावासीलाई त्रसित बनाएको छ। यस्ता घटना अत्यन्तै दुःखद, निन्दनीय तथा राज्यको सुरक्षा संयन्त्रप्रति गम्भीर प्रश्न उठाउने खालका रहेको नेकपा (एमाले) जिल्ला कमिटी, सिरहाले जनाएको छ।
सबैभन्दा दुःखद घटना साउन १३ गते राति घटेको हो, जब नेकपा (एमाले) जिल्ला कमिटी सदस्य कमलदेव यादवका ७५ वर्षीय पिता फनिलाल यादवको आफ्नै निवासमा सुतेकै अवस्थामा धारिलो हतियार प्रयोग गरी विभत्स हत्या गरियो । धनगढीमाई नगरपालिका–११ स्थित आमचोकमा रहेको घरमै वृद्ध यादवको निर्मम हत्या भएपछि स्थानीयवासी स्तब्ध बनेका छन्। नेकपा एमालेले यो घटनालाई अमानवीय, क्रूरतापूर्ण र मर्माहत बनाउने बताउँदै मृतकप्रति श्रद्धाञ्जली र शोकसन्तप्त परिवारप्रति गहिरो समवेदना प्रकट गरेको छ।
यसैबीच, २०८२ साउन ११ गते राति भएको अर्को घटनामा लवकुश बहुद्देश्यीय सहकारी संस्था लिमिटेडको भवनमा अज्ञात समूहले आगजनी तथा लुटपाट गरी संस्था तथा पद्मोदय फाउन्डेसनका महत्वपूर्ण कागजात र सामग्रीहरू नष्ट पारेका छन् । त्यसै रात धनगढीमाई नगर प्रमुखद्वारा सञ्चालित शिशु ज्योति विद्यालयको स्कुल बसमा पनि आगजनी गरिएको छ। यी घटनाहरूले नगरमा थप त्रास फैलाएको छ।
एमाले जिल्ला कमिटी सिरहाले बारम्बार उजुरी दिँदा पनि अपराधीहरूलाई संरक्षण गरिएको जस्तो देखिनु र प्रहरी प्रशासनको उदासिनता गम्भीर विषय भएको बताएको छ। पार्टीले प्रहरी प्रशासनप्रति कडा आपत्ति जनाउँदै तीन बुँदे माग अघि सारेको छः
१. सबै घटनाहरूको निष्पक्ष छानबिन गरी दोषीलाई अविलम्ब कानूनी दायरामा ल्याइयोस्।
२. पीडित परिवारहरूलाई शीघ्र न्याय दिलाई सुरक्षाको भरपर्दो व्यवस्था गरियोस्।
३. यदि प्रहरी प्रशासनले अझै गम्भीरता नदेखाएमा नेकपा (एमाले) जिल्ला कमिटी सिरहा आन्दोलनमा जान बाध्य हुनेछ, जसको सम्पूर्ण जिम्मेवारी राज्य र प्रशासनको हुनेछ।
ने.क.पा.(एमाले) जिल्लेला अध्यक्ष अशोक यादवले शान्तिप्रेमी नागरिक, सञ्चारकर्मी, नागरिक समाज र लोकतान्त्रिक शक्तिहरूलाई यस्ता आपराधिक गतिविधिविरुद्ध एकजुट भई आवाज उठाउन आह्वान गरेको छ। साथै, हाल सिर्जित असहज परिस्थितिमा सबैलाई संयमित रहन र आपसी सद्भाव कायम राख्न अपिलसमेत गरिएको छ।
Discussion about this post