नयाँ वर्ष मनाउन जानकी मन्दिरमा भारतीय नागरिकको घुँइचो (तस्विर सहित)

नयाँ वर्षको मौका छोपी भारतको विहारको विभिन्न स्थानबाट श्रद्धालुहरु जानकी मन्दिरमा पूजापाठ गर्न पुगेका छन् ।

कोरोनाको कारण पछिल्लो दुई वर्ष देखि प्रभावित हुँदै आएको नयाँ वर्षमा यस पटक कोरोना संक्रमण कम रहेको समय भारतीय पर्यटकहरु जनकपुरधाम आएका छन् । भारतको विहार र नेपालका आन्तरिक पर्यटकहरु समेत जानकी मन्दिरमा आज आएका हुन् ।

विश्वकै हिन्दुको आस्थाको केन्द्रको रुपमा रहेको प्राचिन मिथिलाको राजधानी जनकपुरधाममा अहिले भारतीय नागरिक र गाडीले भरेको छ ।
भारतको विहार राज्य मधुवनीबाट आएका मनोज यादवले नयाँ वर्षको सुरुवात जानकी मन्दिरमा पूजा गर्दा झन राम्रो भएकोले नयाँ वर्षकै मौका छोपी पूजापाठ गर्न आएको बताए ।

जानकी मन्दिरका छोटे महन्थ रामरोशन दासले अंग्रेजी वर्षमा यस पटक अत्याधिक श्रद्धालुभक्तजन आएको बताए । उनले भने, ‘हामी अंग्रेजी वर्ष त मनाउँदैनौ, हामी धार्मीक मान्छे छौँ विक्रम सम्वत नै मनाउँछौँ । तर जसको श्रद्धाले उसले पूजा पाठ गरेर मनाउनु राम्रो हो ।’

छोटे महन्थ दासले नयाँ वर्षमा पहिले माछा, मासु, मदिरा खाएर मनाउने गरेपनि अहिले आएर पूजापाठ गरेर पनि नयाँ वर्ष मनाउन थालेको भन्दै उनले भने, ‘माछा, मदिरा, रक्सी कहिल्यै हिंसात्मकै ठाउँ दिन्छ । संस्कारको बोध गराउँदैन्, एउटा संस्कारमा आउनु ठुलो उपब्धी हो ।’

पछिल्लो समय नयाँ वर्षमा भारतीय नागरिकहरु बढी आउने गरेका छन् । विहारमा मदिरा बन्द रहेका कारण समेत यहाँ तिनीहरु आउने गरेका छन् ।