रसुवा । रसुवागढी हाइड्रोपावर कम्पनी लिमिटेडले गएको असार १३ गतेदेखि निष्कासन गरेको आईपीयोमा मागअनुसारको आवेदन अझै परेको छैन।
निष्कासन भएको २३ दिन बितिसक्दा ३९ लाख ९१ हजार कित्ताको लागि आवेदन परेको छ। कम्पनीको अनुसार मंगलबार साँझसम्म २० हजार ८२७ आवेदकले ३९ लाख ९१ हजार ८४० को लागि आवेदन दिएका हुन्। आवदेकबाट ३९ करोड ९१ लाख ८४ हजार रुपैयाँ संकलन भएको छ।
आईपीयोमा मागअनुसारको आवेदन नपरेपछि समय थप गरिएको थियो। कम्पनीले असार १३ गतेदेखि २७ गतेसम्मको समयसीमा राखेर आईपीयो निष्कासन गरेको थियो। सो अवधिमा मागअनुसारको आवेदन नपरेका कारण साउन १० गतेसम्म समय थप गर्न सकिने व्यवस्था थियो।
कम्पनीले आयोजना प्रभावित क्षेत्रका स्थानीयबासीका लागि ६८ लाख ४२ हजार १०० कित्ता सेयर निष्कासन गरेको छ। आईपीयोमा न्यूनतम १० कित्ता र अधिकतम ७०० कित्तासम्म आवेदन दिन सकिने छ।
यसमा बिक्री प्रबन्धकको काम सिदार्थ क्यापिटलले गरिरहेको छ। कम्पनीले गोसाइँकुण्ड गाउँपालिका-१ थुमन र वडा नम्बर २ टिमुरेलाई अति प्रभावित, प्रसारण लाइनबाट प्रभावित हुने आमाछोदिङ्मो गाउँपालिका-४ गोल्जुङ, वडा नम्बर ५ चिलिमे, गोसाइँकुण्ड गाउँपालिका-४ लाङटाङ, ५ स्याफ्रु र ६ धुन्चेलाई प्रभावित तथा बाँकीलाई सामान्य प्रभावित गरी तीन भागमा वर्गीकरण गरिएको छ।
निष्कासन गरिएको १० प्रतिशत सेयरमा अति प्रभावित, प्रभावित र सामान्यलाई क्रमशः ४.५:१.५:१ अनुपातमा सेयर बाँडफाँड गरिएको कम्पनीले जनाएको छ। आईपीयोमा नेपाल धितोपत्र बोर्डबाट स्वीकृत प्राप्त सम्पूर्ण सि-आस्बा सदस्य बैंक तथा वित्तीय संस्था र तीनका शाखा कार्यालयबाट आवेदन दिन सकिने छ।
विश्वव्यापी फैलिएको कोरोना भाइरस (कोभिड-१९) को कारण लामो समयसम्म सेयर निष्कासन प्रक्रिया रोकिएको थियो। कम्पनीले रसुवाको गोसाइँकुण्ड गाउँपालिका-२, टिमुरेमा १११ मेगावट क्षमताको रसुवागढी जलविद्युत् आयोजना निर्माण गरिरहेको छ।
यसको ८३ प्रतिशत काम सकिएको छ। स्थानीयका लागि नेपालमा पहिलो पटक चिलिमे हाइड्रोपावर कम्पनीले सेयर निष्कासन गरेको थियो।
Discussion about this post