विराटनगर : इलामबाट सम्बन्धित निकायको अनुमतिबिना नै बहुमूल्य सखुवाको काठ झापा पुर्याइएको फेला परेको छ। इलामको रोङ गाउँपालिका–५ मा रहेको चुल्ठे शान्तिगर सामुदायिक वन उपभोक्ता समितिले आन्तरिक खपतका लागि उपभोक्तालाई वितरण गरेको काठको गोलिया झापाबाट सशस्त्र प्रहरीले बरामद गरेको छ। झापाको बुद्धशान्ति गाउँपालिका–५ र ६ को सिमानाबाट एक ट्याक्टर काठका गोलिया नियन्त्रणमा लिएर सशस्त्रले आवश्यक अनुसन्धान र कारबाहीका लागि मंगलबार राति इलामको रोङस्थित सव डिभिजन वन कार्यालयलाई बुझाएको हो।
सशस्त्रले मे १ त ७५४३ नम्बरको ट्याक्टर र चालकसहित काठ नियन्त्रणमा लिएको थियो। ४५ वर्षीय महेन्द्र तामाङले चलाएको ट्याक्टरबाट सखुवासहित करम जातको काठका गोलिया पनि बरामद भएको छ। सखुवाको ८६.५३ र करमको ४२.३५ क्यूफिट गोलिया बरामद भएको सव डिभिजन वन कार्यालय रोङका फरेष्टर होमचन्द्र गौतमले जानकारी दिए। सशस्त्र प्रहरीले गौतमलाई नै काठ बुझाएको हो। गोलियामध्ये सखुवाको ३ लाख ४६ हजार १ सय २० र करमको १५ हजार ५ सय रूपैयाँ बराबरको छ।
गौतमका अनुसार आन्तरिक खपतका लागि समितिले पक्रिया पूरा गरेरै काठ उपभोक्तालाई वितरण गरेको पाइएपनि ओसारपसार गलत तरिकाले गरिएको पाइएको छ। तर अनुमति नलिइकन ओसारपसार गरिएको उनले बताए। समितिले उपभोक्तालाई वितरण गरेको भएपनि काठ एउटाबाट अर्को ठाउँ वा फरक जिल्लामा लैजान वन कार्यालयबाट अनुमति लिनुपर्छ। चिरान गर्न काठ लगेको भनिए पनि वन कार्यालयबाट चिरान आदेश र ओसारपासरको अनुमति नलिएको पाइएपछि तस्करीको आशंकामा सशस्त्रले नियन्त्रणमा लिएको हो।
वन कार्यालयको अनुमतिबिना इलामबाट झापातिर ओसारपसार हुने गरेको पाइएपछि ट्याक्टरसहित काठ बरामद गरेर कारबाहीका लागि सम्बन्धित निकायलाई बुझाइएको सशस्त्र प्रहरी बल प्रदेश १ का प्रमुख डीआईजी कमल गिरीले जानकारी दिए। ‘काठलगायत वन पैदावारको चोरी तस्करी नियन्त्रण गर्न सशस्त्र प्रहरीले निगरानी बढाउँदै कडाइ गरिरहेको छ,’ डीआईजी गिरीले भने।
समितिले वितरण गरेको काठ ५ जना उपभोक्ता मिलेर एउटा ट्याक्टरमा लोड गर्दै झापा लगेको पाइएको वन कार्यालयले जनाएको छ। इलामका डिभिजन वन अधिकृत दानबहादुर श्रेष्ठले गोलियामा टाँचा लगाइएको अवस्थामा भेटिएकाले काठ आधिकारिक नै भएको बताए। केही गोलिया भने टाँचा नलगाइएको अवस्थामा भेटिएका थिए। ‘इलामबाट चिरान गर्न काठ झापा लागेको प्रारम्भिक अनुसन्धानबाट खुलेको छ। वन कार्यालयबाट चिरान आदेश लिएर मात्रै यसरी लैजान पाइन्छ,’ श्रेष्ठले भने, ‘नियमविपरीत गरेको पाइएपछि समितिदेखि काठ प्राप्त गरेका उपभोक्तामाथिसमेत छानबिन थालिएको छ। वनको अनुमति र आदेश बिना काठ ओसारपसार गरेर अर्को जिल्ला लैजानु गैरकानुनी हो।’
अनुसन्धानबाट खुलेको तथ्यका आधारमा काठ ओसारपसारमा संलग्नमाथि कारबाही हुने उनले बताए। ‘काठ आधिकारिक भएपनि आदेशबिना ओसारपसार गर्नु कानुनविपरीत हो,’ श्रेष्ठले भने, ‘इलामबाट बहुमूल्य काठ झापा पुर्याउँदा प्रक्रिया पूरा गरेको देखिँदैन।’ प्रक्रिया पूरा नगरिकन काठ लगिएका कारण विभिन्न आशंका पैदा भएकाले मिहीन ढंगबाट अनुसन्धान थालिएको उनले बताए।
Discussion about this post